Vinton Gray "Vint" Cerf (New Haven, Connecticut, ) estatubatuar informatikaria da. Matematikako diplomatura lortu zuen Stanfordeko Unibertsitatean, eta informatikakoa, Kaliforniakoan. Interneten sortzailetzat hartzen da, eta sarearen defendatzaile sutsuenetakoa da. IBM informatika-etxean lan egin ondoren, Leonard Kleinrocken taldeko kide izan zen Kaliforniako Unibertsitatean (UCLA). Han egin ziren Interneten aitzindari izan ziren lehenengo lau nodoak. 1972az geroztik, Robert Kahnekin lan egin zuen ARPAn (Estatu Batuetako Defentsako Ikerketa Aurreratuen Sailean), Arpanet, Satnet (sare-satelitea) eta Prnet (irrati-sarea) sareen loturaren azterketan, eta internet bat antolatu zuen horretan oinarrituta. TCP/IP 1973an aurkeztu zen, eta 1974an argitaratu zen ''Transactions on Communications'' aldizkarian. MCI telekomunikazio-elkarteko lehendakariorde izan zen, eta han lan egin zuen 1982az geroztik. Internet Society elkartearen sortzaileetako bat izan zen 1992an, eta elkarte horretako presidente, 1995era arte. 2010az geroztik, Broadband Commission for Digital Development batzordeko komisarioa da, banda zabaleko Interneteko teknologiak eskuragarriago bihurtzea helburu duen Nazio Batuen saileko kidea.
Wikipediatik informazioa lortu
